![\"\"](\"https://www.aravot.am/2011/aravot_arm/April/27/p8.jpg\")
Ճգնաժամից հետո Հայաստանի տնտեսությունը, այդ թվում ակնագործական արդյունաբերությունը վերականգնվում է։ Այս մասին ասել է էկոնոմիկայի նախարար Տիգրան Դավթյանը՝ ադամանդի արդյունահանման ռուսական խոշորագույն «Ալռոսա» ընկերության ներկայացուցիչների եւ Հայաստանի ադամանդագործական ընկերությունների ներկայացուցիչների կլոր սեղանի ժամանակ: «Ակնագործական արդյունաբերությունը մենք մտադիր ենք վերադարձնել զարգացման նախաճգնաժամային մակարդակին»,- հայտարարել է նախարարը:
«Ալռոսա»-ի փոխնախագահ Յուրի Օկաեմովն ասել է, որ 2010-ին իրենց ընկերության եւ Հայաստանի կառավարության միջեւ նախապատրաստական աշխատանք է տարվել հայ-ռուսական միջկառավարական հանձնաժողովի գործունեության շրջանակում, ինչը թույլ է տալու հստակեցնել եւ կայունացնել հարաբերություններն ակնագործական արդյունաբերությունում: «ՀՀ կառավարությունն այսօր պատրաստ է բաց աշխատել, մեզ դուր է գալիս, որ էկոնոմիկայի նախարարությունը մտադիր է գործել իր ոլորտի անունից: Մենք նաեւ պատրաստվում ենք աշխատել թափանցիկ եւ բաց առաքումների ծավալների եւ տեսականու ուղղությամբ՝ կատարելով բոլոր պլանները, որոնց մասին մենք խոսել ենք»,- ըստ tert.am-ի, ասել է նա եւ հավելել, որ հայ-ռուսական միջկառավարական հանձնաժողովի շրջանակում ձեռք բերված պայմանավորվածությունը հայկական ընկերություններին $30 մլն-ի արժողությամբ ալմաստ մատակարարելու մասին ընկերության սահմանագիծը չէ։ Նա նշեց, որ այդ ծավալները կարող են ընդլայնվել հայկական ընկերությունների կողմից իրենց պարտավորությունները կատարելու դեպքում:
2011-ի առաջին եռամսյակի վերջի դրությամբ՝ հայկական ձեռնարկությունները «Ալռոսա»-ից ներկրել են $6.85 մլն-ի ալմաստ: Յուրի Օկաեմովն ասաց, որ համաշխարհային շուկաներում արձանագրվել է ալմաստի հումքի դեֆիցիտ:
Նա հայ արտադրողներին հրավիրեց մասնակցել վաճառքի նոր ձեւի՝ մրցութային առեւտրի, որին ընկերությունը ձեռնամուխ է լինելու հունիսին:
