Հայտնի ծանրամարտիկ Յուրի Վարդանյանը, որը ներկայումս ՀՀ նախագահի խորհրդականներից է, գտնվում է «Էրեբունի» բժշկական կենտրոնի վերակենդանացման բաժանմունքում: Այդ մասին երեկ «Ա1+»-ին հայտնել է առողջապահության նախարարության մամուլի քարտուղար Շուշան Հունանյանը: Յ. Վարդանյանը մի քանի օր առաջ Մոսկվայում գտնվելիս վնասել է ոտքը, որն անցած տարվա հոկտեմբերին ավտովթարի ժամանակ կոտրվել էր, իսկ ազդրում տեղադրվել էր մետաղյա ձող: Նա տեղափոխվել է Երեւան եւ վիրահատվել, սակայն վիրաբույժները ստիպված են եղել դադարեցնել վիրահատությունը՝ ուղեղի թթվածնային սնուցման հետ կապված խնդիրների պատճառով: Տվյալ պահին Յուրի Վարդանյանը գտնվում է հետվիրահատական շրջանում: Ըստ վերջին տվյալների՝ բժիշկները նրա վիճակը գնահատում են «կայուն ծանր»:
