«Երեկ Թուրքիայի վարչապետ Ռեջեփ Թայիփ Էրդողանի գլխավորությամբ տեղի ունեցած Ռազմական արդյունաբերության գործադիր կոմիտեի նիստի ժամանակ որոշում է կայացվել ռազմական ուղղաթիռների գնման հարցում նախապատվությունը տալ ամերիկյան Sikorsky ընկերությանը»,- հղում անելով թուրքական լրատվամիջոցներին՝ tert.am-ը փոխանցում է Թուրքիայի պաշտպանության նախարար Վեջդի Գյունուլի հայտարարությունը։ Գյունուլի խոսքով՝ թուրքական կողմը պատրաստվում է առաջին փուլում Sikorsky ընկերությունից գնել 109 ուղղաթիռներ, որոնց թիվը հետագայում կարող է հասնել 600-ի։ Առաջին ուղղաթիռները Թուրքիա կբերվեն 4 տարի հետո։ Գործարքի արժեքը կազմում է 3,5 միլիարդ դոլար։ Թուրքական ԶԼՄ-ների փոխանցմամբ՝ Անկարան երկար ժամանակ չէր կարողանում որոշում կայացնել իտալական AgustaWestland եւ ամերիկյան Sikorsky ընկերությունների միջեւ։ Ի վերջո, Թուրքիայի իշխանությունները նախապատվությունը տվեցին Sikorsky-ին։
