ՀՀ ԿԳ նախարար Արմեն Աշոտյանը Ռումինիա կատարած պաշտոնական այցի շրջանակում երեկ հանդիպում է ունեցել Ռումինիայի ԿԳ նախարար Դանիել Ֆուներիուի հետ, որից հետո երկու նախարարները հանդես են եկել մամուլի ասուլիսով: Ասուլիսի ընթացքում ռումինացի լրագրողները նախարարից հետաքրքրվել են, թե ինչպե՞ս նա կմեկնաբանի Ռումինիայի նախագահի՝ Բաքվում կատարած հայտարարությունը եւ ՀՀ ԱԳՆ նախարարի տեղակալ Շավարշ Քաչարյանի պատասխանը, եւ արդյո՞ք նա այդ հայտարարությունը չի դիտարկում որպես խոչընդոտ՝ կրթության եւ գիտության ոլորտում հայ-ռումինական համագործակցության համար: Նախարար Արմեն Աշոտյանը պատասխանել է, որ հայ-ռումինական հարաբերությունները կրթության եւ գիտության ոլորտում խարսխված են ոչ թե աշխարհաքաղաքական եւ տնտեսական շահերի, այլ՝ քաղաքակրթական նմանությունների եւ ընդհանրությունների վրա: ԼՂ խնդրի խաղաղ կարգավորումը, Մինսկի խմբի մոտեցումներին համաձայն, հիմնված է երեք հիմնական սկզբունքի վրա՝ ինքնորոշման, խաղաղ կարգավորման եւ տարածքային ամբողջականության: ԼՂ ժողովուրդը, օգտվելով սեփական ճակատագիրը տնօրինելու իրավունքից, վաղուց կայացրել է իր որոշումը եւ որեւէ կարծիք, որը հակասում է Ղարաբաղի ժողովրդի այդ որոշմանն ու միջազգային հանրության դիրքորոշմանը եւ արված է Ադրբեջանի իշխանությանը հաճոյանալու համար, չի կարող ազդել Ղարաբաղի ժողովրդի ճակատագրի վրա:
