Այսօր ԵՊՀ-ում կկայանա Հայոց մեծ եղեռնի տարելիցի առթիվ ԵՊՀ-ի կողմից հրատարակված գրքերի շնորհանդեսը: Այդ գրքերի շարքում է նաեւ իսպանացի ժամանակակից գրող Գոնսալո Հ. Գուարչի «Հայոց կտակը» վեպը: Վեպը Հայոց ցեղասպանության նվիրված եռագրության երկրորդ վեպն է, առաջին` «Հայկական տոհմածառը» վեպում պատմվում էր Պատմական Հայաստանում 1915-1916թթ. կատարվող ողբերգությունը: «Գոնսալո Հ. Գուարչի վեպը ոչ միայն արդարամիտ մտավորականի ցասումի եւ մեր հայրենակորույս ազգակիցների ցավի ու վրդովմունքի ճիչն է, այլ նաեւ սթափության կոչ է՝ ուղղված նախճիրը գործած մարդասպանների հետնորդներին, միջազգային ատյանների այն դիվանագետներին, որոնց խղճի վրա է ծանրացած եղեռնագործությունը: Հույս ունեմ, որ այս աշխատանքով կկարողանամ իմ համեստ ավանդը ներդնել Հայ Դատի արդար գործին», -ասաց եռագրության թարգմանիչ, ԵՊՀ ռոմանական բանասիրության դասախոս Մերի Սուքիասյանը:
