Երեկ մի խումբ բնապահպանական կազմակերպություններ Հրազդանի երկաթի հանքի շահագործման շուրջ քննարկում էին ծավալել: Այս անգամ բնապահպաններն ավելի վճռական են տրամադրված եւ ի տարբերություն նախորդ հանրահավաքի, խոստացան, որ հաջորդը ավելի բազմամարդ է լինելու: Բնապահպանները վստահեցրին, որ իրենց նախաձեռնող խմբում նաեւ իրավաբան են վարձել, որը մանրամասն ուսումնասիրելու է հանքի շահագործման համար տրված լիցենզիան: Նրանք նամակով դիմել են կառավարությանը եւ մի շարք հարցեր բարձրացրել՝ արդյոք մինչ լիցենզիա տրամադրելը հաշվի՞ են առնվել բնապահպանական վնասները: Բնապահպանների խոսքերով՝ «Քանի որ հանքը գտնվում է այն բլրի վրա, որի տակից աղբյուր է հոսում, ապա հանքը շահագործելու դեպքում տուժելու են նախեւառաջ Հրազդանի, Ծաղկաձորի, Աբովյանի խմելու ջրերը եւ մասամբ էլ՝ Երեւանի: Բացի այդ, բլրի հարեւանությամբ է հոսում Հրազդան գետը, սա նշանակում է՝ հանքի շահագործումը աղտոտելու է Արարատյան դաշտավայրի ոռոգման ջերերը»:
Նշենք, որ Հրազդան քաղաքում երկաթի հանքի շահագործումը տրվել է չինական «Fortune oil» ընկերությանը:
