BBC-ի ռուսական ծառայությանը տված իր հարցազրույցում ՀՀ առաջին նախագահ Լեւոն Տեր-Պետրոսյանի՝ ԼՂ հիմնախնդրին վերաբերող հատվածը, «Ժառանգություն» կուսակցության խորհրդարանական խմբակցության ղեկավար Ստեփան Սաֆարյանի ասելով, հիշեցնում է Մադրիդյան սկզբունքները: «Դա մեզ համար անընդունելի է»,- «Ա1+»-ի մատուցմամբ, երեկ հայտարարել է Ստ. Սաֆարյանը՝ շեշտելով, թե համամիտ չէ Տեր-Պետրոսյանի այն տեսակետին, ըստ որի՝ ԼՂ խնդրի կարգավորումը հանգուցալուծմանը ամենամոտն է եղել 1997թ.-ին: «Ժառանգության» ներկայացուցչի կարծիքով, ՀՀ երեք նախագահներն էլ ԼՂ հիմնախնդրի կարգավորման գործընթացում նույն տեսակետն են ունեցել: Նա պատահական չի համարում այս օրերին ԵԱՀԿ Մինսկի խմբի ԱՄՆ նախկին համանախագահ Քերի Քավանոյի այն հայտարարությունը, թե ԼՂ հիմնախնդրի լուծումը մոտ էր 2001թ.-ին: Այդուհանդերձ, Սաֆարյանը գտնում է, որ այսօր ԼՂ հարցում բանավեճի մեջ մտնելը վտանգավոր է: Ըստ նրա, որքան մոտենան ընտրությունները, ՀՀ-ն այնքան հայտնվելու է հարձակումների հորձանուտում: Իսկ հորձանուտ պատրաստողներն ու ճնշումներ բանեցնողները գերտերություններն են:
