Միացյալ Նահանգների Պետդեպը գաղտնի ֆինանսավորել է սիրիական ընդդիմությանը: Reuters-ի մատուցմամբ, այդ մասին են վկայում WikiLeaks սկանդալային կայքում հրապարակված տվյալները: Washington Post-ում երկուշաբթի օրը տեղ գտած հրապարակման համաձայն, սիրիական ընդդիմությունը օգնություն սկսել է ստանալ դեռեւս Ջորջ Բուշ կրտսերի օրոք՝ 2005-ին, երբ Վաշինգտոնի եւ Դամասկոսի հարաբերությունները սառեցվել էին: 2006-ից Պետդեպը 6 մլն դոլար է հատկացրել Barada TV արբանյակային հեռուստաալիքին, որը կառավարվում է Լոնդոնից սիրիացի ներգաղթյալների մի խմբի, ինչպես նաեւ հենց Սիրիայում գտնվող մի խումբ ընդդիմադիրների կողմից: Օգնությունը, սակայն, շարունակվել է նաեւ Բարաք Օբամայի օրոք: Հեռուստաալիքը հեռարձակվել սկսել էր 2009-ի ապրիլին, բայց իր գործունեությունը ակտիվացրել է այս տարվա մարտին՝ Սիրիայում բողոքի զանգվածային ցույցերի մեկնարկից հետո: Հիշեցնենք, որ սիրիացի ցուցարարները երկրի իշխանություններից պահանջում են ազատությունների ընդլայնում, ինչպես նաեւ 11 տարի Սիրիայում նախագահող Բաշար Ասսադի հրաժարականը:
