Լուսանկարիչ եւ Լեհաստանի Գդանսկ քաղաքում ցուցահանդեսի սեփականատեր Վլադիսլավ Ժուխովսկին մարտի 10-ին հայտարարել է, որ ձեռք է բերել լեգենդար լեհ կոմպոզիտոր Ֆրեդերիկ Շոպենի մինչ այժմ անհայտ լուսանկարը, որի վրա նշված է տարեթիվը՝ 1849թ., ինչը համընկնում է Շոպենի մահվան տարեթվի հետ։ Ելնելով լուսանկարի վրա եղած մակագրությունից՝ կարելի է դատել, որ լուսանկարի հեղինակը ֆրանսիացի լուսանկարիչ Լյուի-Օգյուստ Բիսոնն է։ Վ. Ժուխովսկին լուսանկարը գնել է անցած տարվա դեկտեմբերին։ Նրա խոսքով, այն պահպանվել է Շոպենի երկրպագու եւ շոտլանդացի ուսանող Ջեյն Սթերլինգի հավաքածուում։ Լեհ կոլեկցիոները չի հայտնել, թե որքան գումար է ծախսել լուսանկարը ձեռք բերելու համար։ Լուսանկարի իսկությունը դեռ պետք է ճշտվի։ Սակայն լուսանկարների փորձագետ Մալգոժատ Գրաբչեսկան կասկածում է, որ դա Շոպենի լուսանկարն է։ Բացի այդ, Բիսոնը երբեք չի ստորագրել իր նկարների տակ։ Իսկ եթե ապացուցվի, որ նկարն իրական է, գտածոն սենսացիա կդառնա, քանի որ մինչեւ այժմ հայտնի է եղել Շոպենի միայն երկու լուսանկար։
