Կազանում մեկնարկեց ծանրամարտի Եվրոպայի տղամարդկանց 90-րդ եւ կանանց 24-րդ առաջնությունը:
Առաջին օրը Հայաստանի հավաքականի կազմից մրցահարթակ մտավ Եվրոպայի նախորդ առաջնության փոխչեմպիոն, 56 կգ քաշային Սմբատ Մարգարյանը: Հայ ծանրորդը, որ հաղթողի հիմնական հավակնորդներից էր համարվում, այս անգամ երկամարտի 245 կգ արդյունքով տասներկու մասնակիցների մեջ զբաղեցրեց իններորդ տեղը: Սինգապուրի պատանեկան անդրանիկ օլիմպիական խաղերի արծաթե մեդալակիրը երկու վարժություններում ընձեռվող վեց մոտեցումից արդյունավետ օգտագործեց միայն երկուսը: Պոկումում Սմբատը բարձրացրեց 105 կգ, սակայն հաջորդ երկու մոտեցումներում ձախողեց 110 կիլոգրամը: Դա 9-րդ ցուցանիշն էր:
Հայ մարզիկն իրեն ավելի վստահ է զգում հրում վարժությունում, ուստի կորցրածը ետ բերել եւ մրցանակային տեղ զբաղեցնել պիտի աշխատեր հենց այդ մրցաձեւում: Նա վարժությունն սկսեց 140 կգ-ից: Հաջող սանձելով առաջին քաշը՝ Սմբատը երկրորդ մոտեցման համար պատվիրեց միանգամից 11 կգ ավելի: Սակայն երկու անգամ էլ ծանրաձողը չենթարկվեց ծանրորդի կամքին: Այդուհանդերձ, Սմբատ Մարգարյանը անձնական քաշի շնորհիվ այս վարժությունում արժանացավ փոքր բրոնզե մեդալի:
Երեկ երեկոյան պայքարի մեջ էր մտել 53 կգ քաշային Էլեն Գրիգորյանը:
