![\"\"](\"https://www.aravot.am/2011/aravot_arm/April/13/p8.jpg\")
Հյուսիսատլանտյան դաշինքը Լիբիայում քաղաքացիական բնակչությանը պաշտպանելու համար բավարար ջանքեր չի գործադրում: Reuters-ի մատուցմամբ, հայտարարել է Ֆրանսիայի արտգործնախարար Ալեն Ժյուպենը՝ մեկ օր անց այն բանից հետո, երբ տապալվել է Աֆրիկյան միության կողմից հակամարտության կարգավորման վերաբերյալ առաջարկված ծրագիրը:
Ժյուպենը կարծիք է հայտնել, որ ՆԱՏՕ-ի թիրախ պետք է լինի Լիբիայի հյուսիսում գտնվող եւ ապստամբների կողմից վերահսկվող Միսուրատայի շուրջ Քադդաֆիի բանակի տեղակայած ծանր տեխնիկան: Հատկապես այդ քաղաքի համար են հակամարտող կողմերը ծանր մարտեր մղում, ինչը ստիպել է ընդդիմությանը Աֆրիկյան միության՝ կրակը դադարեցնելու կոչերը որակել անիմաստ: «Աֆրիկյան միության նախաձեռնությունը չի նախատեսում Քադդաֆիի եւ նրա որդիների հեռացումը երկրի քաղաքական ասպարեզից, ուստիեւ՝ ակտուալ չէ»,- հայտարարել է ապստամբների առաջնորդ Մուստաֆա Աբդել Ջալիլը՝ Աֆրիկյան միության պատվիրակների հետ Բենգազիում տեղի ունեցած բանակցություններից հետո: Քադդաֆիի որդին՝ Սաիֆը, իր հերթին բացառել է հոր կողմից իշխանությունից հրաժարվելու որեւէ հնարավորություն:
«ՆԱՏՕ-ն պետք է ամբողջ ծավալով կատարի իր ստանձնած խնդիրը: Նա ուզում էր ստանձնել օպերացիայի ղեկավարությունը՝ մենք համաձայնեցինք: Նա պետք է կատարի իր առջեւ դրված խնդիրը՝ թույլ չտալ, որպեսզի Քադդաֆին ծանր հրազենի կիրառմամբ ռմբահարի քաղաքացիական բնակչությանը»,- հայտարարել է Ժյուպենը՝ Լիբիայում ստեղծված իրավիճակի հարցով շփման խմբի հետ Դոխուում կայանալիք հանդիպմանը մեկնելուց առաջ: Լիբիայում ջանքերն ակտիվացնելու կոչով ՆԱՏՕ-ին է դիմել նաեւ բրիտանական ԱԳՆ ղեկավար Ուիլյամ Հեյգը:
Կարմիր խաչը հաղորդել է, թե Տրիպոլիում գրասենյակ է բացում ու Միսուրատայի բնակիչներին օգնություն տրամադրելու համար այդ քաղաք է գործուղում իր աշխատակիցներին: Սակայն լիբիացի նախարարներից մեկը զգուշացրել է, թե որեւէ մարդասիրական օպերացիա՝ օտարերկրյա զորքերի մասնակցությամբ՝ կգնահատվի որպես Լիբիային պատերազմի հայտարարություն:
ՆԱՏՕ-ի գլխավոր քարտուղար Անդերս Ֆոն Ռասմուսսենը հայտարարել է, թե լիբիական իշխանությունները նախկինում էլ էին հայտարարել ռազմական գործողությունները դադարեցնելու մասին, բայց այդպես էլ չեն պահել իրենց խոստումը: Ընդսմին, Amnesty International իրավապաշտպան կազմակերպությունը երեքշաբթի օրը հայտարարել է, թե Քադդաֆիի կողմնակից զինվորները, ըստ ամենայնի, «մահապատժի են ենթարկել ավելի վաղ գերի վերցրած ապստամբներին»:
