«Ինտերնետով հրապարակային ծանուցման մասին» ՀՀ օրենքի պահանջներին համապատասխան, 2011թ. ապրիլի 7-ից սկսել է գործել ՀՀ ինտերնետային ծանուցումների պաշտոնական կայքը՝ www.azdarar.am: Կայքի վարումը, տեխնիկական սպասարկումը, կայքում տեղեկատվության զետեղման հետ կապված հարցերի քննարկումը եւ կայքի հետ կապված այլ հարցերի լուծումը իրականացնում է ՀՀ արդարադատության նախարարության աշխատակազմի իրավաբանական անձանց պետական ռեգիստրի գործակալությունը: ՀՀ ինտերնետային ծանուցումների պաշտոնական կայքի ստեղծումը պայմանավորված է 2007 թ. ապրիլի 9-ին ՀՀ Ազգային ժողովի կողմից ընդունված եւ 2007թ. մայիսի 4-ին ՀՀ նախագահի կողմից ստորագրված «Ինտերնետով հրապարակային ծանուցման մասին» ՀՀ օրենքով, որի 2-րդ հոդվածում ասվում է. «Օրենքով կամ նորմատիվ իրավական այլ ակտով սահմանված այն դեպքերում, երբ նախատեսվում է հրապարակային ծանուցում՝ տեղեկատվությունը մամուլում հրապարակելու միջոցով, տեղեկատվությունը պարունակող հայտարարությունը պետք է տեղադրվի նաեւ https://www.azdarar.am հասցեով գտնվող ՀՀ հրապարակային ծանուցումների պաշտոնական ինտերնետային կայքում (այսուհետ՝ կայք)»: Նշված օրենքի պահանջների իրականացումն ապահովելու նպատակով ՀՀ կառավարությունը 2011թ. փետրվարի 17-ին ընդունել է N174-Ն որոշումը՝ «Ինտերնետով հրապարակային ծանուցման ենթակա հայտարարության ընդունման, կայքը վարող անձին փոխանցման, կայքում հայտարարությունների տեղադրման եւ արխիվացման ժամկետների սահմանման կարգը եւ հայտարարության տեքստը ներկայացնելու էլեկտրոնային ձեւաչափը հաստատելու մասին»:
