![\"\"](\"https://www.aravot.am/2011/aravot_arm/April/6/p11.jpg\")
Երեւանի քաղաքապետարանի նախաձեռնությամբ մարզատրամաբանական խաղերի մարզադպրոցում անցկացվեց Երեւանի մինչեւ 15 տարեկան պատանիների եւ աղջիկների ռենձյուի առաջնություն:
Այս հին ճապոնական խաղը, որը հետագայում վերաճել է մարզաձեւի, ինչ-որ տեղ հիշեցնում է բոլորիս քաջ հայտնի «կետ- խաչ» խաղը, սակայն մի շարք կարեւոր տարբերություններով: Ինչպես մյուս տրամաբանական խաղերում, այստեղ եւս օգտագործվում են սեւ եւ սպիտակ խաղաքարեր: Մրցակիցները հերթով մեկական խաղաքար են դնում խաղատախտակի վանդակների անկյուններում եւ հաղթում է նա, ով կարողանում է խաղատախտակի վրա առաջինը կառուցել հինգ քարերի անընդմեջ շարք՝ հորիզոնական՝ ուղղահայացով կամ անկյունագծով: Այժմ աշխարհի 60 երկրներում, այդ թվում նաեւ Հայաստանում, գործում են ռենձյուի ֆեդերացիաներ:
Ինչ վերաբերում է մրցաշարին, այն անցկացվեց շվեյցարական մրցակարգով, պատանիների խմբում՝ ինը, իսկ աղջիկների՝ յոթ փուլերով: Պատանիների մեջ հարյուր տոկոսանոց արդյունք ցույց տվեց Վահե Պողոսյանը՝ դառնալով մրցաշարի հաղթող: Ութ միավոր վաստակած նրա եղբայրը՝ Դավիթը, գրավեց երկրորդ տեղը, իսկ լավագույն եռյակը 7 միավորով եզրափակեց Ստեփան Ամիրխանյանը: Աղջիկների խմբում նույնպես առաջատարը Պողոսյանների ընտանիքից էր՝ Վահեի ու Դավիթի քույրը՝ Եվան: Նա էլ յոթ հնարավորից 7 միավոր վաստակեց՝ մեկ քայլով ետ թողնելով Սյուզաննա Հակոբյանին: Հինգ միավորով եռյակը եզրափակեց Սոնա Եփրեմյանը:
Երեւանի քաղաքապետարանը հաղթողներին եւ մրցանակակիրներին պարգեւատրեց դիպլոմներով եւ մեդալներով:
