![\"\"](\"https://www.aravot.am/2011/aravot_arm/April/6/p8.jpg\")
Livejournal-ի աշխատակազմը երեքշաբթի օրը հայտարարել է, թե ինտերնետ-ծառայությունը դժվարությամբ է ետ մղում հակերների հարձակումները, որոնց նպատակը Ռուսաստանում տեղեկատվության եւ կարծիքների փոխանակման անկախ հարթակ դարձած ու ժողովրդականություն վայելող կայքերից մեկի ոչնչացումն է: Reuters-ի մատուցմամբ, կայքում ի հայտ եկած խնդիրները գրավել են նաեւ խորհրդարանական ընդդիմության ուշադրությունը: Կոմունիստները «իշխանական կուսակցության» բյուրոկրատներին մեղադրել են սոցիալ-քաղաքական ցանցի դեմ ճնշումների մեջ եւ խոստացել են իրենց դժգոհություններով դիմել ինտերնետ ազատության պաշտպանին ու երկրի նախագահ Դմիտրի Մեդվեդեւին:
Անցած շաբաթ հակերների հարձակումների արդյունքում մի քանի ժամ շարունակ կայքն անհասանելի է եղել՝ ծառայությունը շարքից դուրս է եկել, նույնը ավելի երկար ժամանակով տեղի է ունեցել երկուշաբթի օրը: Այդ մասին հայտարարել է հոսթինգի ղեկավարությունը:
«Երեկվա հարձակումն ուղղված է եղել առաջին տասը բլոգերների եւ հասարակության դեմ: Հարձակման պատճառը տվյալ դեպքում ավելի քան ակնհայտ է. ինչ-որ մեկը շատ է ուզում, որ կայքը դադարի գոյություն ունենալ՝ որպես ազատ հարթակ»,- իր բլոգում գրել է SUP ընկերության արտադրության զարգացման տնօրեն Իլյա Դրոնովը: SUP ընկերության բաժնետերերից մեկը նաեւ ֆինանսական մագնատ Ալեքսանդր Մամունտն է, որը ներառված է Forbs-ի ամենահարուստ ռուսաստանցիների հարյուրյակում:
Հավելենք միայն, որ, Ռուսաստանում անցկացված սոցհարցումների համաձայն, Ռուսաստանում տեղեկատվության գլխավոր աղբյուրը հասարակության մեծամասնության համար մնում է իշխանությունների վերահսկողության տակ գտնվող եւ նրանց հնազանդ հեռուստատեսությունը, եւ համացանցն է մնացել այն ազատ տարածքը, որտեղ կարելի է անկախ գնահատականներ եւ գրաքննության չենթարկվող տեղեկություն ստանալ:
