Վրացական Բաթում քաղաքի իշխանությունները շտապ տարհանել են քաղաքային նավահանգստի բոլոր աշխատակիցներին՝ այն բանից հետո, երբ պարզել են, որ տեղանքում ճառագայթման բարձր մակարդակ է գրանցվել։ Այս մասին հայտնում է tert.am-ը՝ վկայակոչելով վրացական «Ռուսթավի 2» հեռուստաալիքը։ Ճառագայթման աղբյուրը հայտնաբերվել է նավահանգստի տարածքում գտնվող մետաղի ջարդոնում։ Դեռեւս հայտնի չէ, թե ինչպես են այդ վտանգավոր մետաղները հայտնվել Բաթումի նավահանգստում։
Արտակարգ իրավիճակի կապակցությամբ դեպքի վայր են ժամանել փրկարարական ջոկատներ, Թբիլիսիից հրավիրվել են փորձագետներ։ Նավահանգիստ տանող բոլոր ճանապարհները փակվել են. լիովին արգելված է մուտք գործել վտանգավոր գոտի։ Վրաստանի իշխանություններից դեռ որեւէ պաշտոնական մեկնաբանություն չի հնչել։ Հայտնի է միայն, որ մետաղի ջարդոնը գտնվել է երկաթուղու կառամատույցի վրա։
