Երեւան քաղաքին մատուցած ծառայությունների, քաղաքապետարանի հետ սերտ համագործակցության, մայրաքաղաքում անցկացվող տոնակատարությունների կազմակերպմանը ցուցաբերած աջակցության, ինչպես նաեւ հասարակական կյանքում ներդրած զգալի ավանդի համար՝ Երեւանի քաղաքապետի որոշմամբ՝ «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը պարգեւատրվել է «Երեւանի զինանշան» հուշամեդալով։ Կարեն Կարապետյանը համոզմունք է հայտնել, որ այս ընկերության օրինակը ոգեւորիչ պետք է լինի հասարակության համար։ Շնորհակալություն հայտնելով պարգեւի համար, Ռալֆ Յիրիկյանը նշել է, որ իրենք պատրաստակամ են շարունակել համագործակցությունը Երեւանի քաղաքապետարանի հետ։ «Մեր պարտքն է մասնակցել բոլոր այն միջոցառումներին, որ արվում է հօգուտ մեր բնակչության»,- նշել է Ռալֆ Յիրիկյանը։ Կարեն Կարապետյանը, ընդգծելով քաղաքային տնտեսության կառավարման համակարգում բիզնես կառույցների ներգրավման անհրաժեշտությունը, ներկայացրել է մայրաքաղաքում ներդրումային առումով հետաքրքրություն ունեցող ոլորտներն ու այն ուղղությունները, որտեղ քաղաքապետարանը պատրաստ է փոխշահավետ համագործակցության։ Ռ. Յիրիկյանը հավաստիացրել է, որ մանրամասն կքննարկվեն առաջարկվող բոլոր ծրագրերը։ Ողջունելով քաղաքապետարանի «Օգնիր դպրոցիդ» ծրագիրը՝ «ՎիվաՍել-ՄՏՍ» ընկերության գլխավոր տնօրենը պատրաստակամություն է հայտնել օժանդակել ծրագրի իրականացմանը։
