![\"\"](\"https://www.aravot.am/2011/aravot_arm/April/2/p1.jpg\")
Երեւանի քաղաքապետարանը երեկ ապամոնտաժել է Ազատության հրապարակում գտնվող՝ նկարում պատկերված կարուսելներն ու բատուտները: Այս քայլի պատճառաբանությունները բազմազան են: Կենտրոնի վարչական շրջանի ղեկավար Գագիկ Գյանջումյանն «Ա1+»-ին ասել է. «Քաղաքապետարանը որոշել է, որ երեւի արդեն ավելի ազատ հնարավորություն ստեղծվի ե՛ւ երեխաների, ե՛ւ երաժշտություն լսողների, ե՛ւ մշակութային ծրագրերի համար: Այդ նպատակով որոշվել է ազատել տարածքը»: Epress.am-ին Երեւանի քաղաքապետարանի հասարակայնության եւ կապերի բաժնից ասել են, որ հրապարակում տեղակայված բատուտը չէր ապահովում երեխաների անվտանգությունը. «Իսկ մնացածը հանվել է, որովհետեւ մշակույթի վարչությունն այլ միջոցառումներ է նախատեսում: Միջոցառումների այս փուլն ավարտված է, հիմա այլ բնույթի միջոցառումներ են իրականացվելու»: Մինչդեռ «Արմինֆոն» հաղորդել է, թե վերջերս «Facebook»-ում ստեղծվել էր օպերայի շենքի տեսքն այլանդակող փչովի բատուտների դեմ շարժում, որին մի քանի օրվա ընթացքում ավելի քան 1000 մարդ էր միացել: Խմբի անդամները «Facebook»-ի միջոցով դիմել էին Երեւանի քաղաքապետ Կարեն Կարապետյանին, որն էլ արձագանքել էր, թե «մոտ ժամանակներս փոփոխություններն ակնհայտ կլինեն»:
