Հինգշաբթի օրը Քուվեյթի նախարարների կաբինետը հրաժարական է տվել, որպեսզի, ինչպես ենթադրվում է, խուսափի երկրի խորհրդարանի կողմից հարցաքննության ենթարկվելուց: Reuters-ի մատուցմամբ, այդ մասին հաղորդել է Քուվեյթի խորհրդարանի աղբյուրը:
Խորհրդարանը թույլտվություն էր խնդրել հարցաքննել երեք նախարարների, որոնք հանդիսանում են Քուվեյթում իշխող՝ աս-Սաբահ ընտանիքի անդամներ: «Նախարարները վարչապետին հրաժարականի դիմում են ներկայացրել, որը կառավարության ղեկավարն ուղարկելու է էմիրին»,- ասել է օրենսդիր մարմնում գործակալության աղբյուրը:
Մարտի 31-ին Քուվեյթի էմիր Սաբահ աս-Սաբահը վարչապետ Նասեր աս-Սաբահին հանձնարարել է նոր կառավարություն ձեւավորել:
Հավելենք, որ շատ երկրներում՝ խորհրդարանում նախարարներին հարցաքննելը նորմալ երեւույթ է, բայց Քուվեյթում դա համարվում է անմիջական մարտահրավեր նախարարին եւ թաքնված մարտահրավեր՝ ուղղված էմիրին: Նավթարդյունահանող այդ երկրում ընթացող քաղաքական գործերում վերջին խոսքն էմիրինն է:
