«Ռուսաց լեզուն՝ որպես 21-րդ դարում միջմշակութային հաղորդակցության, գիտական համագործակցության, միջանձնային եւ միջազգային հարաբերությունների երաշխավոր». այսպես էր վերնագրված 2-րդ միջազգային գիտագործնական համաժողովը, որն անցկացնում է Հայաստանում ՌԴ դեսպանատունը՝ ՀՀ ԿԳ նախարարության հետ միասին: Այս տարի համաժողովը, որը նվիրված էր ականավոր գիտնական Մ. Լոմոնոսովի ծննդյան 300-ամյակին, հյուրընկալվեց Վանաձորի պետական մանկավարժական ինստիտուտում: Ծրագիրը գերհագեցած էր, զեկույցները՝ Ռուսաստանից, Ղազախստանից, Հայաստանից ու Արցախից: Սակայն օտարերկրյա բուհերից ներկայացուցիչներ կային միայն Լոմոնոսովի անվան Մոսկվայի պետական համալսարանից եւ Ա. Պուշկինի անվան ռուսաց լեզվի պետական ինստիտուտից, մյուս մասնակիցներն ուղարկել էին զեկույցները: Վերջինները 3 ուղղվածություն ունեին՝ գրականագիտություն, լեզվաբանություն եւ մեթոդիկա: Ի՞նչ անել, որպեսզի նյութը մատուցվի հետաքրքիր, մատչելի եւ, իհարկե, պրոֆեսիոնալ: Սրանք հարցեր են, որոնց ճիշտ պատասխանելու դեպքում կարելի է գտնել այն ուղիները, որոնք կնպաստեն ռուսաց լեզվի «վերադարձին» ԱՊՀ տարածք: Եթե խորհրդային երկրներում ռուսերենը, կարելի է ասել, դարձել էր երկրորդ մայրենի, ապա այսօր ետխորհրդային տարածքում այն ետ է մղվել՝ տեղը զիջելով հիմնականում անգլերենին: Այսօրվա սերունդն արդեն լավ չի տիրապետում ռուսերենին, նշանակում է՝ նրա համար դժվարամարս են այդ լեզվով ստեղծված համաշխարհային մշակութային արժեք ունեցող գործերը: «Մենք պետք է մեր ուսանողների մեջ սերմանենք այս գաղափարը, որպեսզի հարյուրավոր, հազարավոր գրքեր, որոնք այսօր ունենք գրադարանում, «չքնեն» դարակներում»,- համաժողովի գործնական մասն այս տեսանկյունից է դիտարկում ՎՊՄԻ ռեկտոր Գուրգեն Խաչատրյանը:
