![\"\"](\"https://www.aravot.am/2011/aravot_arm/March/31/p9.jpg\")
Ճապոնական «Ֆուկուսիմա1» ատոմային էլեկտրակայանի չորս ռեակտորները, որոնք վնասվել են այդ երկրում տեղի ունեցած տարերային աղետի հետեւանքով, շահագործումից դուրս կբերվեն: Այդ մասին, BBC-ի մատուցմամբ, հայտարարել է ԱԷԿ-ի սեփականատեր TEPCO ընկերության ներկայացուցիչը: Հինգերորդ եւ վեցերորդ ռեակտորների ճակատագիրը կորոշվի տեղի բնակչության հետ խորհրդակցություններից հետո:
Վերջին երեք շաբաթների ընթացքում TEPCO-ն փորձում է վերահսկողության տակ առնել ԱԷԿ-ում ստեղծված իրավիճակը, բայց այդ ջանքերը հաջողություն չեն արձանագրում:
Նախօրեին Ճապոնիայի իշխանությունները հայտարարել են, որ ԱԷԿ-ի մոտակայքում ծովային ջրերի ռադիոակտիվ աղտոտման մակարդակն էապես ավելին է, քան հաղորդվել էր նախկինում: «Ֆուկուսիմա 1»-ի օպերատորը խոստովանել է, որ առայժմ հայտնի չեն այն կոնկրետ պատճառները, որոնք հանգեցնում են ռադիոակտիվ նյութերի արտահոսքին դեպի օվկիանոս: Միջուկային անվտանգության ճապոնական գործակալությունը զգուշացրել է, որ ռադիացիոն աղտոտման այդ մակարդակը վնասակար է մարդկանց առողջության համար: Գործակալության տնօրեն Խիդեխիկո Նիսիյաման ասել է, թե ԱԷԿ-ի շրջակա բնակավայրերի բնակչությունը տարհանվել է, մերձակա ջրերում ձկնորսությունն արգելվել է: Չորեքշաբթի օրը տարհանված կենտրոններ է ժամանել Ճապոնիայի կայսր Ակիխիտոն՝ տիկնոջ հետ:
