Երեկ տնտեսական մրցակցության պաշտպանության հանձնաժողովը (ՏՄՊՊՀ) իր նիստում որոշեց 100 մլն դրամով տուգանել Լուսակերտի տոհմային թռչնաբուծական ֆաբրիկային (ԼՏԹՖ), քանի որ վերջինս, ըստ ՏՄՊՊՀ-ի, 2010-ի դեկտեմբերին հանրապետության առեւտրի կետերում արձանագրված ձվի դեֆիցիտի եւ իրացման գների կտրուկ բարձրացման մեղավորն էր: Այս տարվա մարտի 12-ին ՏՄՊՊՀ-ի հարուցած վարչական վարույթի արդյունքում հաստատվել է, որ Լուսակերտի ֆաբրիկան միտումնավոր դեֆիցիտ է առաջացրել՝ չարաշահելով իր գերիշխող դիրքը, ավելին, մի շարք փաստաթղթեր է կեղծել, որոշ դեպքերում՝ խանութների մասնակցությամբ: Հանձնաժողովի ձեռքի տակ գտնվող կեղծ պայմանագրերը կփոխանցվեն Հարկային մարմիններին եւ ՀՀ դատախազություն, որոնց լիազորության շրջանակում են նման գործերի հետաքննությունները:
Հանձնաժողովի մարտի 30-ի նիստում որոշում է կայացվել նաեւ գյուղացիական տնտեսություններից ստացված դժգոհությունների հիման վրա ազոտական պարարտանյութերի շուկայում ուսումնասիրություններ սկսելու եւ այդ շուկայում աշխատող տնտեսվարող սուբյեկտներից տեղեկատվություն պահանջելու մասին:
