Երեկ Սիրիայի նախագահ Բաշար Ասադը ընդունել է երկրի կառավարության հրաժարականը: Այդ մասին հաղորդում է BBC-ն՝ վկայակոչելով սիրիական հեռուստաընկերությունը: Սպասվում է, որ կառավարության հրաժարականից հետո 24 ժամվա ընթացքում կձեւավորվի նոր գործադիր իշխանություն:
Panarmenian.net-ը հիշեցնում է, որ նախօրեին Սիրիայի փոխնախագահ Ֆարուք Շարան հայտարարել էր, թե նախագահ Բաշար Ասադը մոտակա երկու օրերի ընթացքում մտադիր է հայտարարել «կարեւոր որոշումների» մասին, որոնք երկրի ղեկավարությունն ընդունել է զանգվածային բողոքների ճնշման ներքո:
Առաջիկա քաղաքական փոփոխությունների մասին Սիրիայի իշխանությունները հայտարարել էին մարտի 24-ին՝ Հորդանանին սահմանակից Դերաա քաղաքում սկիզբ առած ժողովրդական հուզումներից կարճ ժամանակ անց: Հիշեցնենք, որ բողոքի ցույցերի 10 օրերի ընթացքում Դարաայում զոհվել է առնվազն 61 մարդ:
Սպասվում է, որ երկրում բազմակուսակցական համակարգ կներդրվի, ԶԼՄ-ների մասին նոր օրենք կընդունվի, կիրականացվի դատական բարեփոխում, իսկ ամենակարեւորը՝ կվերանայվի երկրում տասնամյակներ առաջ հայտարարված արտակարգ դրությունը: Ցուցարարները, սակայն, պահանջում են նաեւ երկրի նախագահ Ասադի հրաժարականը:
