Կառավարության վերջին նիստում վարչապետ Տիգրան Սարգսյանն անդրադարձավ պանրի անվտանգության խնդիրներին. «Վերահսկողական ծառայությունը սննդի անվտանգության տեսչության հետ հետազոտություններ է կատարել պանրի արտադրության ոլորտում եւ հայտնաբերել լրջագույն խնդիրներ»,- հայտարարեց վարչապետը։ Թե ինչ խնդիրներ են եղել դրանք, վարչապետը չմանրամասնեց։ «Առավոտի» ունեցած տեղեկություններով, սակայն, վարչապետի վերահսկողության ծառայության ուսումնասիրությունները բացահայտել են, որ Երեւանի խանութներում վաճառվող պանրի մեջ մանրէների առկայության ցուցանիշը հաճախ 200 անգամ գերազանցել է թույլատրելի սահմանը։
