Գուգարք գյուղի բնակչի համար դատախազը պահանջել է 13 տարվա ազատազրկում
Գուգարքի 39-ամյա բնակիչ Արմեն Պողոսյանը, որը հաշվառված է Վանաձորում, մեղադրվում է ՌԴ քաղաքացի Ստանիսլավ Նիզովի սպանությունը պատվիրելու մեջ:
Ըստ մեղադրական եզրակացության, ՌԴ-ում եղած ժամանակ՝ 2001 թ. հունիսի սկզբին, Արմեն Պողոսյանն առաջարկել է իր ծանոթ Ալեքսանդր Սիդորովին 1500 ԱՄՆ դոլար գումարի դիմաց սպանել Ստանիսլավ Նիզովին:
Ժամանելով դեպքի վայր՝ Ալեքսանդր Սիդորովը Ստանիսլավ Նիզովին հրազենային վնասվածքներ է պատճառել եւ դիմել է փախուստի՝ Արմեն Պողոսյանի կողմից վարած ավտոմեքենայով:
Ստանիսլավ Նիզովը մահացել է շտապօգնության մեքենայի մեջ: Նշված հանցանքը կատարելուց հետո Ալեքսանդր Սիդորովը Արմեն Պողոսյանից ստացել է 1300 դոլար:
2007թ. ՌԴ Վլադիմիր քաղաքի մարզային դատարանը Ալեքսանդր Սիդորովին դատապարտել է 12 տարի ժամկետով ազատազրկման՝ խիստ ռեժիմի գաղութում:
Արմեն Պողոսյանի նկատմամբ քրեական գործն անջատվել է գործից եւ ուղարկվել Հայաստան:
2009թ. օգոստոսի 25-ից Արմեն Պողոսյանը կալանավորված է եւ գտնվում է ԱՆ «Վանաձոր» ՔԿՀ-ում:
Ամբաստանյալ Պողոսյանը չի ընդունում մեղքը, պաշտպանն էլ մեղադրանքը անհիմն է համարում:
Արմեն Պողոսյանի պաշտպան Կարինե Գասպարյանը նշում է, որ նախաքննական մարմինը իր պաշտպանյալի նկատմամբ մեղադրանքը հիմնավոր է համարում, քանի որ կա Սիդորովի մասին օրինական ուժի մեջ մտած դատավճիռ, այնինչ՝ Սիդորովը բազմիցս հակասական ցուցմունքներ է տվել:
Պաշտպանն ասում է, որ նախաքննական մարմինը, բազմակողմանի եւ օբյեկտիվ քննություն իրականացնելու փոխարեն, առաջնորդվել է ենթադրություններով՝ իր պաշտպանյալին հնարավորություն չտալով իր իսկ դեմ ցուցմունքներ տվող անձանց հետ առերեսման: Ըստ պաշտպանի՝ նախաքննական մարմինը խախտել է անմեղության կանխավարկածը, առաջնորդվել միայն ենթադրություններով: Մեղադրանքը հիմնված է ընդամենը 2 անձանց հակասական ցուցմունքների վրա:
«Սիդորովի կինը ցուցմունք է տվել այն մասին, որ իբր Արմեն անունով անձը տուն է բարձրացել, ասել՝ «այսօր արի իրագործենք», նույն անձի մեկ այլ ցուցմունքում ասվում է, որ մեքենայի վարորդը ազդանշան է տվել, ամուսինը իջել է: Ինքը ճանաչել է Արմենին, քանի որ նախկինում մեկ անգամ տեսել է նրան: Եթե կարմիր «Ժիգուլի» մակնիշի ավտոմեքենան է տեսել, ենթադրել է, որ Արմենն է մեքենայի ղեկին եղել, առավել եւս, որ հետագայում նշվում է, որ անհայտ մեքենայով են մոտեցել դեպքի վայրին»,- հակասական ցուցմունքների մասին էր պատմում պաշտպանը:
Բացի այդ, ըստ պաշտպանի, Սիդորովը նախաքննական ցուցմունք է տվել այն մասին, որ ինքն է Արմեն Պողոսյանի պատվերով կատարել սպանությունը, Արմեն Պողոսյանը մնացել է ավտոմեքենայում, այնուհետեւ դատարանում նշել է, որ Արմեն Պողոսյանն է կատարել սպանությունը:
Պաշտպան Գասպարյանը կարծիք է հայտնում, որ այս գործում առկա է ազգային շովինիզմի դրսեւորում: Իրականում ուրիշն է հանցանքը կատարել, որն էլ գցել են հայազգի ներկայացուցչի վրա:
Ըստ պաշտպանի՝ նախաքննության ընթացքում թույլ են տրվել մի շարք խախտումներ. «Նախաքննության ընթացքում քննիչը մեղադրանք է առաջադրել, հիմնվելով միայն գործի՝ Ռուսաստանից ուղարկված պատճենների վրա: Կարող էր գնալ Ռուսաստան՝ ցուցմունքներ վերցնելու՝ գործում եղող վկաներից»:
Պաշտպանը փաստում է, որ հանցագործության կատարման հանցակազմը բացակայում է. «Չկա հիմնավորում, թե ինչո՞ւ, ի՞նչ շարժառիթով է իմ պաշտպանյալը սպանել Նիզովին»:
Բացի այդ՝ Լոռու մարզի ընդհանուր իրավասության դատարանը՝ ի դեմս դատավոր Ն. Հովակիմյանի, բազմիցս հարցումներ է ուղարկել ՌԴ՝ գործով վկաներին ծանուցելու դատական նիստերի մասին:
«Ոչ ոք մինչ օրս ձայն չի հանել, չի ներկայացել դատական նիստերին»,- տեղեկացնում է պաշտպանը:
Դատավճիռը դեռ չի հրապարակվել: Դատախազը Արմեն Պողոսյանի համար պահանջեց ազատազրկում՝ 13 տարի ժամանակով:
