Օրերս աշխատանքային այցով Խաբարովսկի երկրամասում գտնվող ՌԴ-ում ՀՀ դեսպան Օ. Եսայանը դասախոսությամբ հանդես է եկել Խաբարովսկի երկրամասի Տնտեսագիտության եւ իրավունքի պետական ակադեմիայում:
Ինչպես «Արմինֆոյի» մատուցմամբ տեղեկացնում է ՌԴ-ում ՀՀ դեսպանության մամուլի ծառայությունը, դասախոսության ընթացքում դեսպանը բուհի դասախոսներին եւ ուսանողներին ներկայացրել է հայ-ռուսական ռազմավարական գործընկերության ներկայիս ասպեկտները, մասնավորապես՝ շեշտելով այդ հարաբերությունների տնտեսական բաղադրիչի զարգացումը հետճգնաժամային ժամանակահատվածի հեռանկարում:
Օ. Եսայանը ներկաներին պատմել է Հայաստանում ռուսական կապիտալի մասին, ինչն առանցքային դեր է խաղում քաղաքացիների համար նոր աշխատատեղերի ստեղծման հարցում, ինչպես նաեւ ներկայացրել է Ռուսաստանում գտնվող եւ ռուսական ընկերությունների հետ համագործակցող հայկական տնտեսական սուբյեկտների գործունեությունը: Դեսպան Օ. Եսայանն առանձնակի ուշադրություն է դարձրել հնարավոր տնտեսական համագործակցության հեռանկարներին հեռավորարեւելյան երկրամասի հետ եւ ընդգծել է Հայաստանի եւ նշյալ երկրամասի միջեւ տարաբնույթ ինտեգրացիոն ծրագրերի մշակման կարեւորությունը:
