Մի քանի օր շարունակ «Facebook» սոցցանցի օգտագործողները դարձել էին սպամերներ՝ իրենք էլ տեղյակ չլինելով դրա մասին: Հիմնականում այդ հաղորդագրություններն ուղարկվում էին չաթի միջոցով ու պարունակում կրճատված URL-ներ, այնպես որ, միանգամից պարզ չէր՝ ուր է տանում հղումը: «ESET» ընկերության վիրուսային հետազոտությունների կենտրոնի ղեկավար Ալեքսանդր Մատրոսովի խոսքով՝ նմանատիպ կրճատված հասցեներին հետեւելու դեպքում օգտագործողները հայտնվում են «Facebook»-ի ծրագրերին շատ նման էջում, որը թույլտվություն է հարցնում անձնական տվյալներ մուտք գործելու համար: Այն օգտագործողները, որոնք սկսում են օգտագործել այս «ծրագիրը», ակամա սպամեր են դառնում: Մատրոսովի խոսքով՝ նման սպամային ալիքները նպատակ ունեն օգտագործողներին տանել դեպի գովազդային բովանդակություն ունեցող ռեսուրսներ:
