Սարյան 1 հասցեում գործող «Ն.Աղամյան» մթերային խանութի 73-ամյա տնօրենը եկել էր «Առավոտի» խմբագրություն, որպեսզի հայտարարություն տա: Պարզվեց, որ փետրվարի 7-ին խանութում ստուգումներ են իրականացրել Մյասնիկյանի հարկային տեսուչները եւ արձանագրել «Հարկերի մասին» օրենքի խախտումներ: Տեսուչների կազմած ակտի համաձայն, Ն.Աղամյանը խախտել է նշված օրենքի 25 հոդվածը: Հաշվապահական հաշվառում չվարելու կամ սահմանված կարգի խախտմամբ վարելու, սխալ կազմելու համար Ն.Աղամյանին հարկայինը տուգանել է 8 մլն 278 000 դրամի չափով: Տիկին Նադյան ասում է, որ 51 տարի աշխատել է առեւտրի ոլորտում եւ իր հետ կատարվածը դժվար կացության մեջ է գցել իրեն: Նա ուզում էր հայտարարությամբ հավաստել, որ պետության նկատմամբ իր պարտականությունները կկատարի: Թոշակառու կինը դիմել է մի քանի գործարարների, որպեսզի օգնեն իրեն դուրս գալ ստեղծված ծանր իրավիճակից:
Սեփականաշնորհված 165 քմ տարածքից Ն. Աղամյանին մնացել է 40 քմ տարածքը, ուր աշխատում է, քանի որ այն իր եւ թոշակառու ամուսնու ապրուստի միակ միջոցն է:
