![\"\"](\"https://www.aravot.am/2011/aravot_arm/March/22/p15.jpg\")
Լիբիայի ղեկավար Մուամմար Քադդաֆիի կողմնակիցները՝ մոտ 50 հոգի, Կահիրեի Թահրիր հրապարակում փորձել են հարձակվել ՄԱԿ-ի գլխավոր քարտուղար Բան Կի-Մունի վրա: Այդ մասին տեղեկացնում է «Ազատություն» ռ/կ-ն՝ վկայակոչելով «Ֆրանսպրես» լրատվական գործակալությունը: Այլ մանրամասներ, ինչպես նաեւ ՄԱԿ-ի գլխավոր քարտուղարի առողջական վիճակի մասին տեղեկություններ չեն հաղորդվում: Կահիրեից ստացված մեկ այլ տեղեկության համաձայն, Միացյալ Նահանգները շնորհավորել է Եգիպտոսին եւ եգիպտացի ժողովրդին՝ այդ երկրում սահմանադրական փոփոխությունների հանրաքվեի անցկացման կապակցությամբ: Ենթադրվում է, որ փոփոխված սահմանադրությամբ խորհրդարանական եւ նախագահական ընտրությունները Եգիպտոսում տեղի կունենան այս տարվա ընթացքում:
Հիշեցնենք, որ սահմանադրական փոփոխությունների առանցքային դրույթը վերաբերում է երկրի նախագահի առաջադրման եւ պաշտոնավարման կարգին: Ըստ այդ փոփոխությունների, նախագահն այլեւս ընտրվելու է 4 տարի իշխանավարելու լիազորությամբ եւ ոչ ավելի, քան երկու անգամ առաջադրվելու իրավունքով:
