Երեկ ՀՀ կրթության եւ գիտության նախարարությունը եւ Ֆրանսիայի արտաքին ու եվրոպական գործերի նախարարությունը ստորագրել են համաձայնագիր, ըստ որի՝ Հայաստանում իրականացվելու են ֆրանսերեն լեզվի տարածմանն ուղղված միջոցառումներ: Փաստաթղթի տակ իրենց ստորագրություններն են դրել նախարար Արմեն Աշոտյանը եւ ՀՀ-ում Ֆրանսիայի դեսպան Անրի Ռենոն: Ինչպես «Արմինֆոյի» մատուցմամբ նշել է Ա. Աշոտյանը, ըստ համաձայնագրի՝ ֆրանսիական կողմը պարտավոր է օժանդակել ֆրանսերենի խորացված ուսուցմամբ դասարաններում ուսումնական ծրագրերին համապատասխանող ուսումնական նյութերի բազայի ձեւավորմանը, աջակցել Կրթության ազգային ինստիտուտին՝ ֆրանսերենի խորացված ուսուցման դասընթացների ուսումնական ծրագրերի եւ ֆրանսերենի լրացուցիչ կրթական ծրագրերի մշակման աշխատանքներում, ինչպես նաեւ օժանդակել ֆրանսերենի խորացված ուսուցմամբ դասընթացներ դասավանդողների վերապատրաստման կազմակերպմանը: Հայկական կողմն իր հերթին պարտավորվում է ֆրանսերենի խորացված ուսուցման ծրագրեր ստեղծել հանրակրթական դպրոցների 5-12-րդ դասարաններում, անհրաժեշտ տարածքներ տրամադրել դասավանդողների վերապատրաստումների, աշխատանքային հանդիպումների եւ սեմինար պարապմունքների համար։
