Տավուշի մարզպետարանից տեղեկացանք, որ մարզպետ Արմեն Ղուլարյանը եւ Ֆրանսիայի Օ դը Սեն նահանգի գլխավոր խորհրդի նախագահ Պատրիկ Դեւեջյանը օրեր առաջ Ֆրանսիայում ապակենտրոնացված համագործակցության պայմանագիր են կնքել: Հիշեցնենք, որ անցյալ տարվա մայիսին Օ դը Սենի պատվիրակությունը՝ Պատրիկ Դեւեջյանի գլխավորությամբ եղել է Տավուշում, մայիսի 22-ին ստորագրվել էր համատեղ նկատառումների հուշագիր, որով մարզում մի քանի գյուղատնտեսական ծրագիր է իրականացվել:
Մարտի 4-ին կնքված պայմանագիրը նպատակ ունի Տավուշում զարգացնել գյուղատնտեսական ենթակառուցվածքները՝ բարելավել ինքնահոս ջրանցքները եւ պոմպակայանները, կառուցել ագրոբազաներ, զարգացնել անասնապահությունը եւ տնկարանային տնտեսությունները:
