Երեկ մի քանի ժամվա տարբերությամբ «վաղաժամկետ պայմանականով» ազատ են արձակվել 2008թ. մարտիմեկյան դեպքերի կապակցությամբ դատապարտված երկու քաղբանտարկյալներ՝ Ռոման Մնացականյանը՝ «Վանաձոր» քրեակատարողական հիմնարկից, եւ Հարություն Ուռուտյանը՝ «Արթիկ» ՔԿՀ-ից: Հիշեցնենք, որ Ռ. Մնացականյանը կրել է իր համար սահմանված պատժի գրեթե ամբողջ մասը՝ 3 տարի: Նա 3,5 տարվա ազատազրկման էր դատապարտվել «զանգվածային անկարգություններ կազմակերպելու» մեղադրանքով: Հ. Ուռուտյանը 6 տարվա ազատազրկման էր դատապարտվել՝ մեղադրվելով 2008թ. նախագահական ընտրությունների օրը ընտրական գործընթացը խոչընդոտելու եւ Սերժ Սարգսյանի վստահված անձին «ծանր մարմնական վնասվածք հասցնելու» մեջ: «Առավոտի» տեղեկություններով, նրան դեռ մինչեւ Հայ ազգային կոնգրեսի՝ Մատենադարանի մոտ կայանալիք հանրահավաքն էին պաշտոնապես ազատ արձակել: Բայց ՔԿՀ պետը որոշել էր նրա հետ երկար առանձնազրույց ունենալ՝ նպատակ ունենալով նրան հնարավորություն չտալ մասնակցելու այդ հանրահավաքին: Հ. Ուռուտյանը Մատենադարան այդպես էլ չհասցրեց գալ, բայց փոխարենը ՔԿՀ-ից դուրս գալուց հետո անմիջապես եկել էր Ազատության հրապարակ:
