Քանի որ ապրիլից Երեւանի մանկապարտեզներն անվճար են դառնալու, ներկայումս, «Առավոտի» տեղեկություններով, մանկապարտեզներում սկսել են երեխաների եւ նրանց ծնողների փաստաթղթերը պահանջել, որպեսզի պարզ լինի՝ տվյալ երեխան մայրաքաղաքի՞ բնակիչ է, թե՞, ասենք, Արարատի մարզում է գրանցված, բայց հաճախում է Երեւանի մանկապարտեզ: Գուցե առաջին հայացքից սա խտրականություն թվա, բայց հավանաբար վտանգ կա, որ օգտվելով առիթից՝ մոտակա բոլոր մարզերի բնակիչներն իրենց զավակներին կբերեն մայրաքաղաք՝ մանկապարտեզ: Թեեւ քաղաքապետարանի որոշման մեջ ասվում է, որ ընդհանրապես մանկապարտեզներն են անվճար դառնում, ոչ թե կոնկրետ երեխաների համար մանկապարտեզ հաճախելը: Հիշեցնենք, որ Երեւանի ավագանին, նկատի առնելով 2011-ի բյուջետային հնարավորությունները, մարտի 15-ին տեղի ունեցած նիստում միաձայն հավանություն է տվել Երեւանի քաղաքապետի նախաձեռնությամբ ավագանու հաստատմանը ներկայացված Երեւան քաղաքի համայնքային ենթակայության բոլոր մանկապարտեզներն անվճար դարձնելու մասին հարցին: Բացի այդ՝ Երեւանի ավագանին հավանություն է տվել նաեւ նվազագույն աշխատավարձի չափի փոփոխությամբ պայմանավորված՝ նախադպրոցական ուսումնական հաստատությունների աշխատակիցների աշխատավարձի բարձրացման հարցին: Ի դեպ, «ձեռքի հետ» ավագանին հավանություն է տվել նաեւ Երեւանի քաղաքապետարանի աշխատակիցների աշխատավարձերի բարձրացման հարցին:
