Պատասխանելով «Առավոտի» հարցին՝ նախագահ Սարգսյանի՝ ընդդիմությանն արված «ծաղկաձորյան» ռեւերանսների, դատաիրավական համակարգում խոստացված փոփոխությունների ֆոնին չեն ընկալվում ՀԱԿ ակտիվիստների նկատմամբ ոստիկանության կողմից շարունակվող ճնշումները, մասնավորաբար՝ Սամսոն Խաչատրյանի հետ տեղի ունեցածը. արդյոք սա «սանիտարական մաքրո՞ւմ» է 17-ի հանրահավաքից առաջ, իրավապաշտպան Վարդան Հարությունյանն ասաց. «Սամսոն Խաչատրյանի ձերբակալությունը, քաղբանտարկյալներին բանտերում պահելը, ընդդիմադիր գործիչներին մարզերում ու Երեւանում ոստիկանություն տանելը եւ գալիք հանրահավաքին չմասնակցել պարտադրելը ապացուցում են, որ այս ռեւերանսները կազմակերպված խաղ կամ հերթական բլեֆ են: Այս իշխանությունը ինչպես սկսել, այնպես էլ շարունակելու է իր գործը: Նրանք բռնություններից բացի՝ պաշտոնավարելու այլ ձեւ չգիտեն: Իրենց առջեւ երեք տարի է արդեն մեկ խնդիր ունեն դրված՝ ոչնչացնել Հայաստանում ընդդիմությունը: Բանտերով ու բռնություններով լռեցնել քաղաքական ընդդիմախոսներին: Այնպես անել, որ մարդիկ ընդդիմության կոչով փողոց դուրս չգան: Որպես դրան հասնելու մեկ ճանապարհ՝ նրանք գիտեն բռնություններն ու սարսափի մթնոլորտի տարածումը: Նրանք ոչ մի կերպ չեն կարողանում հասկանալ, որ վաղուց արդեն ապրում ենք 21-րդ դարում, որ ընդդիմության ու այլախոհության դեմ պայքարի իրենց կիրառած այս մեթոդներն այլեւս ժամանակավրեպ են, սպառել են իրենց ու նոր ժամանակներում չեն գործելու: Նույնիսկ արաբական աշխարհի զարգացումները նրանց ոչինչ հուշել չեն կարողանում»:
