![\"\"](\"https://www.aravot.am/2011/aravot_arm/March/17/p2.jpg\")
Ընդդիմադիրները ողջունում են Րաֆֆի Հովհաննիսյանի քայլը, ՀՀՇ-ն էլ ակնկալում է, որ նա «Գեղամյան կամ Արթուրիկ» չի դառնա:
Դեռ 2010 թվականի հոկտեմբերի 6-ին մամուլի ասուլիսում Ժողովրդական կուսակցության նախագահ Տիգրան Կարապետյանը հայտարարել է, որ «Ժառանգություն» կուսակցությունն ամերիկյան պրոյեկտ է, որի նպատակը Րաֆֆի Հովհաննիսյանին նախագահի թեկնածու առաջադրելն է: Տիգրան Կարապետյանը Րաֆֆի Հովհաննիսյանին նաեւ «ՑՌՈՒ»-ի ագենտ է անվանել: Երեկ Ժողովրդական կուսակցության նախագահ Տիգրան Կարապետյանն իր զորակցությունն է հայտնել հացադուլ հայտարարած Րաֆֆի Հովհաննիսյանին: Երեկ «Առավոտը» Տիգրան Կարապետյանից հետաքրքրվեց, թե ինչո՞ւ է զորակցում, իր իսկ բնութագրմամբ, «պրոյեկտին»: Կարապետիչի հետ զրույցը ներկայացնում ենք առանց մեկնաբանությունների:
– Այո, ես ասել եմ, որ ինքը Պետդեպի պրոյեկտ է, բայց այսօր ինքը պայքարում է հանուն հայ ժողովրդի: Եվ, ընդհանրապես, մոտեցումները փոխվում են: Ես այսօր իրեն դիտում եմ որպես պատրիոտ: Պարզ ա, որ ինքն արեւմտյան կողմնորոշում ունի: Հետո ի՞նչ, հայ մարդ ա եւ այսօր էլ խիզախ քայլ ա արել, ես ողջունում եմ:
– Րաֆֆի Հովհաննիսյանն այդքան էլ հստակ չի ձեւակերպել իր պահանջները, մի քիչ անհասկանալի, «թե»-ական բան կա: Ի՞նչն է Ձեզ ստիպել փոխելու մոտեցումները:
– Մարդը հասել ա ծայրահեղ վիճակի: Մարդը ըմբոստ ա: Այսօր Հայաստանում ի՞նչը կարելի ա հստակ ձեւավորել, երբ շունը տիրոջը չի ճանաչում:
– Բայց նման իրավիճակում առավել եւս անհասկանալի չե՞ն այդպիսի ծայրահեղ քայլերը:
– Ես համարում եմ, որ շատ ճիշտ ա արել: Մեկով զրո ա արել Լեւոնենց, որ զբաղեցրել ա Ազատության հրապարակը, ու ես ողջունում եմ այդ քայլը:
– Հնարավո՞ր է, որ Դուք էլ միանաք Րաֆֆի Հովհաննիսյանին:
– Ոչ, բայց ես այսօր գնալու եմ իրեն տեսնելու ու սատարելու:
– Իսկ ինչո՞ւ չեք ուզում միանալ, Դուք իր չափ հայրենասեր չե՞ք:
– Ես պատրիոտ եմ, բայց ես ուրիշ անակնկալ ունեմ, կտեսնեք՝ դա որն է:
Երեկ մամուլի ասուլիսում «Ժառանգության» ղեկավարի քայլը ողջունել է նաեւ ՀՀՇ վարչությայն նախագահ Արամ Մանուկյանը՝ այն որակելով՝ «քաղաքական դրսեւորում՝ համարձակ գործընթացով»: Քայլի արդյունավետությանը կամ նպատակահարմարությանն անդրադառնալով՝ նա հավելել է. «Մի տեսակ շատ արագ քայլ է: Եթե ինքը այդպես է արել, եկեք չքննարկենք՝ ինչու է այդպես. արել է, ուրեմն լավ է արել: Ոչ թե անսպասելի էր, մի տեսակ, պահանջ է, եթե պահանջ ես դնում եւ վստահ չես, որ շատ արագ այդ հարցը լուծվելու է, կարող է հայտնվես դժվար վիճակում: Չնայած ձեւեր կան, անժամկետ հացադուլը շատ ռադիկալ է եւ ռիսկային, վտանգավոր է: Ես չէի անի»: Արամ Մանուկյանի տարակուսանքը Րաֆֆի Հովհաննիսյանի քայլի վերաբերյալ այն է, որ՝ աննպատակահարմար է կրիտիկական մեթոդների դիմելը այժմ, երբ կա ժողովրդական պայքարի միասնական ճանապարհ. «Չմտածեք, թե քննադատում եմ: Իսկապես լավ է արել, ճիշտ է արել, դա իր իրավունքն է: Համարձակ քայլ է: Բայց եթե կողքից զուգահեռ գնում է համաժողովրդական իսկական շարժում… Եթե նպաստում է, թող նպաստի: Մենակ թե չխաբեն մարդկանց, Գեղամյան ու Արթուրիկ չլինեն»: Հարցին՝ Կոնգրեսը կարո՞ղ է քննարկել ինչ-որ մարդկանց միջոցով, այդ թվում՝ լիդերների, Րաֆֆի Հովհաննիսյանին միանալու հարցը, կամ արդյոք ընդհանրապես Կոնգրեսը համարո՞ւմ է, որ պետք է, բացի բարոյական աջակցությունից, նաեւ գործնական քաղաքական աջակցություն ցույց տալ Րաֆֆի Հովհաննիսյանին, Արամ Մանուկյանը պատասխանեց. «Հայ ազգային կոնգրեսը այդպիսի հիմնարկ չէ, որ որոշում կայացնի, թե Արամ Մանուկյանը հացադուլի է նստում: Պոլիտբյուրո չէ: Դա քննարկման նյութ չէ: Եթե ես ուզեմ, ես կմիանամ, ինձ ոչ մեկ չի կարող ասել՝ մի գնա, եւ ոչ մեկին էլ չեմ կարող ասել՝ դու գնա հացադուլի նստի»: Իսկ, ընդհանրապես, նա կարծում է, որ շուտով ազգովի ենք նստելու հացադուլի՝ գների բարձրացման պատճառով:
