![\"\"](\"https://www.aravot.am/2011/aravot_arm/March/17/p1.jpg\")
![\"\"](\"https://www.aravot.am/2011/aravot_arm/March/17/p1-2.jpg\")
ՀՅԴ Հայաստանի Երիտասարդական միությունը եւ «Նիկոլ Աղբալյան» ուսանողական միությունը Ռուսաստանի եւ Թուրքիայի միջեւ բարեկամության պայմանագրի 90-ամյակի կապակցությամբ երեկ բողոքի ցույց էին կազմակերպել Հայաստանում ՌԴ դեսպանատան առջեւ: Ներկա էին ոչ միայն ՀՅԴ երիտասարդները, այլ նաեւ կուսակցության ղեկավարները: Պարզել էին պաստառներ. «Ռուս-թուրքական պայմանագիր՝ հայկական հողերի հաշվին», «Ռուսաստանը պետք է տա 1921թ. մարտի 16-ի պայմանագրի քաղաքական գնահատականը» եւ այլն: ՀՅԴ անդամները հայտարարություն ընթերցեցին ու պահանջեցին այն փոխանցել դեսպանատան ներկայացուցիչներից մեկին: Սակայն ՌԴ դեսպանության աշխատակիցները ո՛չ ընդունեցին ՀՅԴ ներկայացուցիչներին, ո՛չ էլ վերցրին բողոքի նամակը: Դրան ի պատասխան՝ ՀՅԴ երիտասարդները պայմանագրի օրինակը ցուցադրաբար դրեցին փոքրիկ դագաղի մեջ, որի վրա գրված էր. «Ռուսաստանի դեսպանատան փոստարկղ՝ ռուս-թուրքական պայմանագրի համար», ու նամակի հետ թողեցին դեսպանատան մուտքի առջեւ:
