![\"\"](\"https://www.aravot.am/2011/aravot_arm/March/15/p14.jpg\")
![\"\"](\"https://www.aravot.am/2011/aravot_arm/March/15/p15.jpg\")
2010 թվականի նոյեմբերի 9-ին «Նախանձելի» անտեղյակություն» լուրով տեղեկացրել ենք, որ համաձայն «Օրենքի ուժ» հասարակական կազմակերպության անցկացրած հարցման՝ ՀՀ մարզերում մարդկանց 79%-ը դժգոհ է մարզում իրականացվող քաղաքականությունից, 54%-ը կարծում է՝ իրավիճակը կշտկվի համակարգային փոփոխությունների արդյունքում: Հարցումը բացահայտել էր մի զարմանալի իրողություն. թիվ 19 ընտրատարածքի (Էջմիածին քաղաք եւ հարակից մի քանի գյուղեր) ընտրողների 42%-ը ընդհանրապես տեղյակ չէ, թե որ պատգամավորն է իրենց ընտրատարածքը ներկայացնում ԱԺ-ում: 2007 թվականից այս ընտրատարածքի պատգամավոր է պաշտոնաթող գեներալ Սեյրան Սարոյանը, սակայն հարցվածների 32%-ը համոզված է, որ իրենց տարածքից պատգամավոր է ընտրվել Հակոբ Հակոբյանը, որն արդեն 3 տարի է՝ պատգամավոր չէ, պատգամավոր է եղել 1999-2003 եւ 2003-2007թթ. խորհրդարաններում:
Այս հարցումից երեք ամիս անց քաղաքական ակտիվության եւ տեղեկացվածության մակարդակի վերաբերյալ հարցում է անցկացրել IWP political researches կազմակերպությունը՝ Երեւան, Էջմիածին, Արտաշատ, Աշտարակ, Աբովյան քաղաքներում:
Ըստ հարցման, Էջմիածնում էլի անտեղյակ են քաղաքական զարգացումներից, քանզի մարդկանց 50 տոկոսը կարծում է, որ իր պատգամավորը Հակոբ Հակոբյանն է: Իսկ ահա Աբովյանում ավելի քան 50 տոկոսը գիտեն, որ իրենց պատգամավորը Գագիկ Ծառուկյանն է: Հարցվածները Գագիկ Ծառուկյանի մասին ասել են, թե նա աչքի է ընկնում բարեգործություններով, իսկ Հակոբ Հակոբյանի մասին էլ՝ թե պարբերաբար շփվում է ընտրատարածքի բնակիչների հետ եւ հասանելի է նրանց համար:
