Հայ ազգային կոնգրեսն առաջարկում է Հայաստանում նվազագույն աշխատավարձի չափը բարձրացնել՝ ներկայիս 32 հազար (մոտ $90) դրամի փոխարեն սահմանելով $200: Երեկ լրագրողների հետ հանդիպմանը ՀԱԿ տնտեսագետ Վահագն Խաչատրյանը պարզաբանեց, թե ինչու: Ըստ tert.am-ի՝ նա ասել է. «Իհարկե, $200-ը հիմնավորված է մեր կողմից։ Նաեւ մեզ հարցադրում կար, թե՝ էդ դեպքում էդ $200-ը բյուջեն ինչպե՞ս է վճարելու, արդյոք բյուջեում համապատասխան գումարներ կա՞ն։ Սա շատ միակողմանի տեսակետ է, երբ որ ներկայացվում է բյուջեի հետ կապված խնդիր, որովհետեւ մենք խոսում ենք նվազագույն աշխատավարձի մասին։ Դա նշանակում է, որ էդ դեպքում հարկային մուտքերը կավելանան։ Եթե նվազագույն աշխատավարձն այսօր 32 հազար դրամ է, 200 դոլարի համարժեքով այսօր կլինի 72 հազար դրամ, հետեւաբար համապատասխան չափով բյուջեի եկամուտները կավելանան։ Եթե հաշվարկները կատարեք, բյուջեի վրա համարյա բեռ չի լինի»: Ըստ Վ. Խաչատրյանի՝ կառավարությունը նպատակ ունի ոչ թե քաղաքացիների եկամուտներն ավելացնել, այլ արտադրությունը հզորացնել, սակայն ՀԱԿ մասնագետները գտնում են, որ Հայաստանում ոչ թե առաջարկը, այլ պահանջարկը պետք է մեծացվի։ «Ինքը՝ շուկան, հետագայում հնարավորություն կտա կողմնորոշվել, թե արտադրական որ ճյուղը զարգացվի»,- ասաց նա։ Դա, ըստ Խաչատրյանի, հնարավորություն կտա եւ բնակչության կենսամակարդակը բարձրացնել, եւ գնաճի խնդիրը լուծել:
