Հաշվի առնելով, որ ՀՅԴ անվան մեջ կա «հեղափոխական» բառը՝ երեկ «Ուրբաթ» ակումբում հյուրընկալված ՀՅԴ խմբակցության ղեկավար Վահան Հովհաննիսյանին լրագրողները խնդրեցին անդրադառնալ ոստիկանապետ Ալիկ Սարգսյանի արտահայտություններին հեղափոխության մասին, մասնավորապես, թե դա նորմալ երեւույթ չէ, «զինված ճանապարհով բռնազավթում է իշխանության»: Ի պատասխան՝ պրն Հովհաննիսյանը կարծիք հայտնեց, թե հավանաբար ոստիկանապետը նկատի է ունեցել հեղաշրջումը. «Հեղափոխությունը բոլորովին քրեական հանցանք չէ եւ մարդկության շարժիչ ուժերից մեկն է՝ ճիշտ այնպես, ինչպես էվոլյուցիան: Էվոլյուցիան եւ ռեւոլյուցիան օրենքներով արգելված չեն, եւ ես կարծում եմ, որ այստեղ լեզվի սայթաքում է: Ոչ թե հեղափոխություն, այլ հեղաշրջում հավանաբար նկատի ուներ հարգարժան պարոն ոստիկանապետը: Իսկ եթե ոչ, մենք կպարզենք, թե ինչ նկատի ուներ»:
Լրագրողները հիշեցրին, թե անցած տարի էլ Ալիկ Սարգսյանը հայտարարել էր, որ հեղափոխությունը կխեղդեն հենց օրորոցում, ուստի դա լեզվի սայթաքում լինել չի կարող: Վահան Հովհաննիսյանի արձագանքն էր. «Ամեն դեպքում, կարծում եմ, որ այստեղ ինչ-որ սխալ կա, թե հիմա լեզվաբանակա՞ն սխալ է, թե՞ մտածելակերպի՝ իմ խնդիրը չէ։ Իսկ օրորոցներում հեղափոխություն խեղդելու փորձն առնվազն վերջին 3 հազար տարվա ընթացքում ոչ մի անգամ չի հաջողվել։ Եթե Հայաստանում դա հաջողվի, ուրեմն մենք նորից կապացուցենք, որ ունիկալ ազգ ենք»:
ՀՅԴ խմբակցության ղեկավարը նաեւ ասաց, թե երկրում պայթյունավտանգ, բայց ոչ հեղափոխական իրավիճակ է ստեղծված. «Հեղափոխական վիճակի եւ պայթյունավտանգ իրավիճակի միջեւ տարբերություն կա, որովհետեւ հեղափոխական վիճակը նաեւ ուղեղների, մտածելակերպի, մոտեցումների փոփոխություն է ենթադրում։ Ես դա դեռ չեմ տեսնում։ Սովից, անելանելիությունից, անարդարությունից ըմբոստանալու, պայթելու միտում հասարակության մեջ կա, բայց այդ պայթյունը Հայաստանում այս պահի դրությամբ կարող է եւ չբերել հեղափոխության, որովհետեւ այդ դրական փոփոխությունների համար պետք է նաեւ դրական լիցք, այլ ոչ թե միայն ատելություն, նախանձ եւ վրեժխնդրության զգացում»:
