Կանանց միամսյակի առիթով Երեւանի «Սուրբ Աստվածամայր» բժշկական կենտրոնում մարտի 8-ից ապրիլի 7-ը կանանց անվճար կվիրահատեն: Բարեգործական այս ակցիան իրականացվում է քաղաքապետ Կարեն Կարապետյանի նախաձեռնությամբ՝ հաշվի առնելով նախկին տարիների դրական արդյունքը եւ բազմաթիվ կանանց դիմումները:
Կենտրոն դիմած կանայք կարող են անվճար բժշկական օգնություն ստանալ գինեկոլոգիական եւ վիրաբուժական ծառայությունների ուղղությամբ՝ բաց եւ էնդոսկոպիկ եղանակներով: Միամսյակի մեկնարկի առիթով կենտրոն էին այցելել Երեւանի քաղաքապետի տեղակալ Վանո Վարդանյանը եւ առողջապահության վարչության պետ Արմեն Ուլիխանյանը։
Ինչպես հայտնում է քաղաքապետարանի լրատվական ծառայությունը, միջոցառման շրջանակներում այս տարի ընդգրկված են նաեւ քաղաքապետարանի ենթակայության համաբուժարանները: «Սուրբ Աստվածամայր» բժշկական կենտրոնի տնօրեն Նիկոլայ Դալլաքյանը հայտնել է, որ ակցիայի շրջանակներում առաջնահերթությունը տրվում է սոցիալապես անապահով խավին։
