![\"\"](\"https://www.aravot.am/2011/aravot_arm/March/10/p12.jpg\")
ՀՀ Լոռու մարզի ընդհանուր իրավասության առաջին ատյանի Ստեփանավանի նստավայրի դատավորի (այժմ՝ ՀՀ վարչական դատարանի դատավոր) ու դատական կարգադրիչների նկատմամբ բռնություն գործադրելու մեջ կասկածվող վանաձորցի 34-ամյա Աշոտ Հարությունյանը մարտի 4-ին ազատվել է կալանքից: Հիշեցնենք, որ վերոնշյալը հաստատելու, դատական կարգադրիչների նկատմամբ մեղադրանք առաջադրելու եւ քրեական գործ հարուցելու համար գործն ուղարկվել էր ՀՀ հատուկ քննչական ծառայություն:
Վարույթն իրականացնող մարմինը որոշում է կայացրել խափանման միջոց կալանավորումը փոփոխել՝ այն փոխարինելով ստորագրություն չհեռանալու մասին որոշմամբ: Աշոտ Հարությունյանի պաշտպան Տիգրան Հայրապետյանն ասում է, որ քննիչ Գաբրիել Պետրոսյանը, առանց իրեն տեղյակ պահելու, գնացել է կալանավայր, հանդիպել Աշոտի հետ, ապա հայտնել խափանման միջոցի փոփոխման մասին: Քննիչը որոշման օրինակը, սակայն, չի տրամադրել պաշտպանական կողմին, ինչը Տիգրան Հայրապետյանը համարում է իր պաշտպանյալի իրավունքների կոպիտ խախտում:
«Մենք չգիտենք՝ ինչ հիմնավորումներով, ինչ հանգամանքներ են հաշվի առել նման որոշում կայացնելու համար, թեեւ վաղուց էինք սպասում դրան»,- բացատրում է պաշտպանը:
Հիշեցնենք, որ Աշոտ Հարությունյանը շուրջ 4 ամիս կալանավորված էր եւ պահվում էր արդարադատության նախարարության «Վանաձոր» քրեակատարողական հիմնարկում:
«Մենք մինչեւ վերջ բողոքարկելու ենք, հասնելու ենք նրան, որ առհասարակ քրեական հետապնդումը վերացվի»,- ասաց պաշտպան Տիգրան Հայրապետյանը:
