![\"\"](\"https://www.aravot.am/2011/aravot_arm/March/2/p1.jpg\")
Երեկ Հայ ազգային կոնգրեսի հրավիրած հանրահավաքին միացան նաեւ «Ժառանգություն» կուսակցության ներկայացուցիչներն ու խորհրդարանական խմբակցության անդամները՝ կուսակցության առաջնորդ Րաֆֆի Հովհաննիսյանի գլխավորությամբ: Հանրահավաքի մասնակիցները ոգեւորությամբ ու ծափողջույններով, նաեւ «Միացում» վանկարկումներով դիմավորեցին «Ժառանգության» ներկայացուցիչներին, Ր. Հովհաննիսյանին սպիտակ մեխակներ նվիրեցին: Ր. Հովհաննիսյանն ու կուսակցության անդամները հարթակ չբարձրացան, նրանք կանգնած մնացին հանրահավաքի շարքային մասնակիցների կողքին: Իսկ հարթակից նրանց ժամանման մասին, առավել եւս նրանց ուղղված ողջույնի խոսք այդպես էլ չհնչեց: Ավելի ուշ Րաֆֆի Հովհաննիսյանն «Ազատություն» ռ/կ-ին ասաց. «Մեր պատգամավորները՝ «Ժառանգության» ներկայացուցիչները, իրենց մարմնի, իրենց հոգու, իրենց ամենօրյա գործունեության վրա զգացել են «Մարտի 1»-ի կնիքը, նրանք եղել են միշտ հրապարակում, միշտ ժողովրդի կողքին: Թող ոչ մեկը չկարծի, որ «Ժառանգությունը» երբեւէ կբացակայի: Մենք այսօր մեր ժողովրդի հետ միասին արժանին ենք մատուցում մեր համաքաղաքացի զոհերի հիշատակին»:
