Անցյալ տարի «Առավոտի» հոկտեմբերի 21-ի համարում «Ես գիտեմ՝ ինչ եմ ուզում» վերնագրով հարցազրույց էր տպագրվել ֆրանսաբնակ դաշնակահար դիրիժոր Վահան Մարտիրոսյանի հետ: Նշել էինք, որ նա Հայաստանի կամերային նվագախմբի ղեկավարի թեկնածուներից մեկն է: Պարոն Մարտիրոսյանն էլ թերթին ասել էր, թե քաղաքակիրթ երկրներում նվագախումբն է որոշում եւ ընտրում իր գեղարվեստական ղեկավարին. «Եվ եթե նվագախումբը չցանկանա, նույնիսկ երկրի նախագահը անզոր կլինի այդ հարցում: Ես գիտեմ՝ ինչ եմ ուզում… ցանկանում եմ, որ նվագախումբը գործի, երաժիշտներն էլ լինեն երջանիկ»: Շաբաթ օրը պաշտոնապես հայտարարվեց, որ նա նշանակվել է Կամերայինի գեղարվեստական ղեկավար, իսկ երեկ պարոն Մարտիրոսյանը Փարիզ թռավ:
