![\"\"](\"https://www.aravot.am/2011/aravot_arm/March/1/p15.jpg\")
Փետրվարի 26-ին եւ 27-ին Տավուշի մարզի Իջեւան, Դիլիջան, Նոյեմբերյան եւ Բերդ քաղաքներում կայացան արտակարգ իրավիճակներում բժշկական առաջին օգնության դասընթացներ:
Ինչպես տեղեկացանք Շվեյցարիայի համագործակցության եւ զարգացման գրասենյակի աշխատակից Սերգեյ Հովհաննիսյանից, այդ ուսուցումը գրասենյակի «Արձագանք» ծրագրի բաղկացուցիչն է: «Արձագանքի» շրջանակներում Տավուշի եւ Վայոց ձորի մարզերում ստեղծվելու են 7 բժշկական ստորաբաժանումներ՝ յուրաքանչյուրը 20 բուժաշխատողով: Այս մասնագիտացված խմբերը պետք է տուժածներին աղետի վայրում հրատապ բուժօգնություն ցուցաբերեն, արդյունավետ համագործակցեն փրկարարների հետ: Շվեյցարական կազմակերպությունը տրամադրել է փրկարարական սարքավորումներ: Դրանք ի պահ են հանձնված քաղաքների հրշեջ կայաններին եւ արտակարգ իրավիճակների դեպքում կօգտագործվեն: Առաջիկայում բժշկական ստորաբաժանումների անդամները փրկարարների հետ ուսումնական վարժանքների կմասնակցեն:
