![\"\"](\"https://www.aravot.am/2011/aravot_arm/February/26/p11.jpg\")
Երեկ Իրաքի մայրաքաղաք Բաղդադում եւ այլ քաղաքներում հազարավոր մարդիկ են փողոց դուրս եկել՝ մասնակցելու «ցասման օրվա» ակցիաներին:
Ցուցարարները կառավարությունից պահանջել են տնտեսական բարեփոխումներ իրականացնել, բարելավել սոցիալական ծառայությունները, աշխատանք գտնելու ավելի մեծ հնարավորություններ ապահովել եւ վերջ տալ կոռուպցիային: Այդ մասին հաղորդում է «Ազատություն» ռ/կ-ն:
Բաղդադում անվտանգության խիստ միջոցառումներ են ձեռնարկվել, երբ հարյուրավոր ցուցարարներ շարժվել են դեպի քաղաքի Թահիր հրապարակ:
Ըստ հաղորդագրությունների, երկրի հյուսիսային Քիրքուք, Մոսուլ եւ Հավիջա քաղաքներում ցուցարարների եւ անվտանգության ուժերի միջեւ բախումների հետեւանքով կան զոհեր եւ վիրավորներ:
Վարչապետ Նուրի ալ-Մալիքին ավելի վաղ իրաքցիներին կոչ էր արել չմասնակցել ցույցերին՝ պնդելով, թե դրանց կազմակերպիչները երկրի նախկին ղեկավար Սադամ Հուսեյնի եւ «Ալ-Քաիդա» ահաբեկչական խմբավորման կողմնակիցներն են, ովքեր ցանկանում են ի շահ իրենց օգտագործել բողոքի ակցիաները:
