ՀՀ ԿԳ նախարար Արմեն Աշոտյանը, «Մեդիամաքսի» փոխանցմամբ, երեկ այցելել է Synopsys-Armenia ընկերություն` երկրի բուհերի համար մշակված կրթական ծրագրերին ծանոթանալու նպատակով: Ինչպես լրագրողներին հայտնել է ընկերության տնօրեն Հովիկ Մուսայելյանը, ընկերության ուսումնական դեպարտամենտում է գտնվում ՀՀ պետական ճարտարագիտական համալսարանի միկրոէլեկտրոնային սխեմաների եւ համակարգերի ֆակուլտետը, որտեղ ուսանում են բուհի ավելի քան 250 ուսանողներ: Նրա խոսքերով, Synopsys-Armenia ընկերությունը համագործակցում է երկրի 5 բարձրագույն ուսումնական հաստատությունների հետ, որոնց լավագույն շրջանավարտները Synopsys-Armenia-ում աշխատելու առաջարկ են ստանում: ԿԳ նախարարը հայտարարել է, որ Synopsys-Armenia ընկերության մասին շատ է խոսվում, եւ ոչ միայն որպես հաջող բիզնեսի օրինակի մասին, այլեւ այն համատեքստում, որ ընկերության օրինակով երեւում է, թե ինչպես է գործատուն մասնակցում մասնագետների կրթության գործընթացին, ովքեր աշխատելու են այդ հատվածում:
