Թե ֆուտբոլային խաղն ինչպե՞ս կավարտվի՝ մեծապես կախված է ոչ միայն ֆուտբոլիստներից ու մրցավարներից, այլեւ տրիբունաներում տեղ զբաղեցրած մարզասերների վարքագծից: Քիչ չեն օրինակները, երբ ֆուտբոլասերների վատ պահվածքի պատճառով կամ խաղն այդպես էլ չի ավարտվել, կամ արդեն հետո չափից ավելի «ակտիվ» աջակիցներ ունեցող թիմը որակազրկվել է:
Ֆուտբոլի երկրպագուները տարբերվում են մյուս մարզաձեւերի սիրահարներից: Նրանք անսպառ էներգիա ունեն ու այն պարպում են՝ սիրելի թիմի կողքին գտնվելով նաեւ արտագնա հանդիպումներում: Ցավոք, բազմաթիվ են այնպիսի դեպքերը, երբ ֆանատների միջեւ իսկական պատերազմական գործողություններ են ծավալվում ինչպես ստադիոններում, այնպես էլ դրանց սահմաններից դուրս:
Իրենց երկրպագուների ագրեսիվությունը մեղմելու եւ այն փողոցներից մարզադահլիճ տեղափոխելու յուրօրինակ ձեւ են գտել Մոսկվայի երկու հանրահայտ ֆուտբոլային ակումբները՝ «Սպարտակն» ու «Դինամոն»: Ռինգում ֆուտբոլասերները մրցել են բռնցքամարտից եւ մենապայքարային այլ ձեւերից, որոնք համեմված են եղել փողոցային կռիվների տարրերով: Ֆանատների առաջին մարտն ավարտվել է սպարտակցիների բացահայտ առավելությամբ՝ 6,5:0,5:
Մտահղացումը, իհարկե, ողջունելի է: Բայց մտավախություն կա նաեւ, որ «գլադիատորները» ռինգում ձեռք բերած փորձը կարող են վերադարձնել ստադիոն կամ փողոց: Առավել եւս, որ, մեր տեղեկություններով, ռուսական կողմը մարտի 26-ին Երեւանում կայանալիք Հայաստան-Ռուսաստան ազգային հավաքականների հանդիպման բավականին շատ տոմսեր է պատվիրել:
![\"\"](\"https://www.aravot.am/2011/aravot_arm/February/25/p22.jpg\")
![\"\"](\"https://www.aravot.am/2011/aravot_arm/February/25/p23.jpg\")
![\"\"](\"https://www.aravot.am/2011/aravot_arm/February/25/p27.jpg\")
![\"\"](\"https://www.aravot.am/2011/aravot_arm/February/25/p24.jpg\")
