![\"\"](\"https://www.aravot.am/2011/aravot_arm/February/23/p15.jpg\")
Զիվորականները կրակ են բացել Կոտ դ’Իվուարի մայրաքաղաք Աբիջանում բողոքի ցույցի մասնակիցների վրա՝ սպանելով առնվազն վեց մարդու: Այդ մասին հաղորդում է BBC-ն: Ականատեսների ասելով, երկրի գործող նախագահ Լորան Գբագբոյի (նկարում) բանակի զինվորները կրակել են այդ երկրում վերջին նախագահական ընտրություններում հաղթանակ տարած ընդդիմադիր թեկնածու Ալասսան Ուատտարայի կողմնակիցների վրա:
Հիշեցնենք, որ վերջինիս հաղթանակը ճանաչել են աշխարհի բազմաթիվ երկրներ եւ միջազգային կառույցներ, այդ թվում նաեւ՝ Աֆրիկյան միությունը: Աֆրիկյան երկրների առաջնորդներն այս միջադեպից հետո կրկին փորձում են համոզել Գբագբոյին՝ նախագահի պաշտոնը հոժարակամ զիջել Ուատտարային ու այդպիսով լուծել երկրում՝ 2010թ. նոյեմբերից ի վեր տիրող քաղաքական ճգնաժամը: Միջազգային մամուլի մատուցմամբ, ոստիկանության եւ ցուցարարների միջեւ ընդհարումներ են տեղի ունեցել նաեւ Ալժիրում: Ոստիկանները փորձել են խոչընդոտել կրթության նախարարության շենքի մոտ ուսանողների ակցիան: Տեղի ունեցած բախումների արդյունքում մեկ մարդ վիրավորվել է: Հիշեցնենք, որ Ալժիրում ընդդիմությունը բողոքի ակցիաներ է նախաձեռնել՝ պահանջելով գործող իշխանությունների հրաժարականը:
