Երեկ ՀՀ քրեական գործերով վերաքննիչ դատարանի դատավոր Արմեն Դանիելյանը մերժեց տուժող Հովհաննես Եղիազարյանի եւ նրա ներկայացուցիչներ Լուսինե Սահակյանի ու Երվանդ Վարոսյանի վերաքննիչ բողոքը: Այն կապված էր «Էլիտ Շանթ» գործարանի սեփականատեր Վարշամ Ղարիբյանի, նրա մերձավոր ազգական Հովհաննես Եղիազարյանի հետ վեճին, վերջինիս առեւանգմանն ու ծեծին: Ինչպես «Առավոտին» հայտնեց Լ. Սահակյանը, դատարանը մերժման հիմնավորումները դեռ չի տրամադրել իրենց: «Որոշումը կտրամադրվի, հիմնավորումներին կծանոթանանք ու կբողոքարկենք ՀՀ վճռաբեկ դատարան: Այս գործում դատարանը չի կարող անկողմնակալ լինել, դատավոր Ա. Դանիելյանն արեց այն, ինչին մենք սպասում էինք»,- ասաց փաստաբան Լ. Սահակյանը:
