![\"\"](\"https://www.aravot.am/2011/aravot_arm/February/22/p19.jpg\")
Թունիսի ժամանակավոր կառավարությունը պաշտոնական հարցում է ուղարկել Սաուդյան Արաբիա՝ պահանջելով էքստրադիցիայի ենթարկել պաշտոնանկ արված նախագահ Զին բեն-Ալիին: Վերջինս Թունիսը կառավարել է վերջին 23 տարիներին եւ Սաուդյան Արաբիա էր փախել հունվարի 14-ին:
Թունիսի ներկայիս իշխանությունները մտադիր են դատել նախկին նախագահին՝ 2010թ. դեկտեմբերին եւ 2011-ի սկզբներին երկրում տեղի ունեցած բողոքի ցույցի մասնակիցների սպանությունների հետ կապված մեղադրանքով:
Թունիսի ԱԳՆ-ի հայտարարությունում ասված է, թե բեն-Ալին մեղադրվում է լուրջ հանցագործությունների հանցակցության մեջ, որոնց նպատակը եղել է «երկրի քաղաքացիների միջեւ թշնամության սերմանումը եւ նրանց՝ միմյանց սպանելուն դրդելը»:
Բացի բեն-Ալիին Թունիս արտաքսելու պահանջից, ԱԳՆ-ն նաեւ խնդրել է Էր-Ռիյադին՝ տեղեկություններ տրամադրել նախկին նախագահի առողջական վիճակի մասին կամ հաստատել՝ արդյոք նա կենդանի՞ է: Հիշեցնենք, որ, ըստ որոշ տեղեկությունների, Թունիսի պաշտոնանկ արված նախագահը կաթված է ստացել եւ գտնվում է ծանր վիճակում:
