Փետրվարի 16-ը, իրոք, հայկական շախմատի հաղթարշավի օր էր Մոսկվայում
![\"\"](\"https://www.aravot.am/2011/aravot_arm/February/18/p21.jpg\")
Այն բանից հետո, երբ ցերեկը հայաստանցիներ Դավիթ Շահինյանն ու Տիգրան Սիմոնյանը դարձան «Aeroflot Open» շախմատային փառատոնի «C» խմբի հաղթողն ու երկրորդ մրցանակակիրը, երեկոյան «Իզմայլովո» հյուրանոցային համալիրի «Գամմա-Դելտա» մասնաշենքում մեր հանրապետության եւս մեկ ներկայացուցչի հաղթանակի վկան դարձանք: «B» խմբում, որտեղ հանդես էին գալիս ՖԻԴԵ-ի 2550-ից պակաս, սակայն 2299-ից բարձր Էլո գործակից ունեցող 105 շախմատիստներ, գրոսմայստեր Տիգրան Քոթանջյանը չափազանց ծանր պայքարում գրավեց առաջին տեղը: Հանգուցալուծումը կայացավ միայն վերջին՝ 9-րդ տուրում, որում հանդիպեցին մրցաշարային աղյուսակի առաջին եւ երկրորդ տեղերը զբաղեցնող Քոթանջյանը եւ ռուսաստանցի գրոսմայստեր Նիկոլայ Կաբանովը: Նրանց դիմակայությունը կողմերից եւ ոչ մեկին առավելություն չբերեց՝ ոչ-ոքի, ու երկուսն էլ պայքարն ավարտեցին 7,0-ական միավորով: Սակայն պայքարին խառնվեց Դարվին Լայլոն: Ֆիլիպինցի գրոսմայստերը սպիտակներով անչափ կարեւոր հաղթանակ տարավ Ռուսաստանի ներկայացուցիչ Ալեքսեյ Գավրիլովի նկատմամբ եւ նույնպես վաստակած միավորների քանակը հասցրեց 7,0-ի: Եվ դա ճակատագրական եղավ Կաբանովի համար:
Ըստ մրցաշարի կանոնակարգի, միավորների հավասարության դեպքում շախմատիստների վերջնական դասավորության համար առաջնային նախապայման է տվյալ մրցաշարում սեւերով ավելի շատ պարտիա խաղացած լինելը: Եվ քանի որ Տիգրան Քոթանջյանն իր երկու հիմնական մրցակիցներից սեւ խաղաքարերով մեկ պարտիա ավելի էր անցկացրել, նրան էլ շնորհվեց հաղթողի կոչումը: Ֆիլիպինցին դարձավ երկրորդ մրցանակակիր՝ Կաբանովին ետ մղելով երրորդ հորիզոնական:
Այս խմբում հանդես եկած մեր մյուս մասնակիցներից առավել հաջող հանդես եկան եւ քսան առաջատարների ցուցակ ընդգրկվեցին նաեւ ՖԻԴԵ-ի վարպետ Հովիկ Հայրապետյանը, որը 6,0 միավորով 11-րդն էր, Հովհաննես Գաբուզյանը՝ 5,5 (14-րդ տեղ) եւ նույնքան միավոր վաստակած գրոսմայստեր Դավիթ Պետրոսյանը՝ 18-րդ հորիզոնական:
Հայ շախմատասերները բարձր արդյունք էին ակնկալում ուժեղագույնների խմբում հանդես եկող մեր երեք առաջատար գրոսմայստերներից: Ասվածն առաջին հերթին վերաբերում է փորձառու Սերգեյ Մովսիսյանին: Սակայն նա 9,0 հնարավորից վաստակելով 5,0 միավոր, պայքարն ավարտեց 26-րդ հորիզոնականում: Նրանից կես միավոր ավելի վաստակեց եւ մրցաշարային աղյուսակում տասն աստիճան բարձր տեղ զբաղեցրեց Տիգրան Լ. Պետրոսյանը: Իսկ Ավետիք Գրիգորյանը 4,5 միավորով 87 մասնակիցների մեջ բավարարվեց 35-րդ տեղով:
«Aeroflot Open»-ի ավարտի հաջորդ իսկ օրը՝ երեկ, Մոսկվայում մեկնարկեց մեկ այլ պատասխանատու մրցաշար՝ կայծակնային շախմատի աշխարհի առաջնության ընտրական մրցաշարը, որտեղ եւս, ըստ «Armchess.am» կայքի, հանդես են գալիս մեր հանրապետության մեծ թվով ներկայացուցիչներ:
